Afrikaans my moedertaal:
my voertaal, my hart.
Ek wil liefhê in Afrikaans.
Ek wil droom in Afrikaans.
Ek wil eet, drink, sing in Afrikaans.
Ek wil lééf in Afrikaans.
Want dit leef in my.
Dit wriemel op my tong en kielie my verhemelte.
Dit sing in my ore en lag in my mond.
Dit karring aan my hartsnare en grawe in my kop.
Dit gee nooit op.
Afrikaans, mooiste taal –
gesels oor my gevoelens, my wese en bestaan.
Afrikaans, liefdestaal -
jy vertolk my.
Jy vang my woorde met jou vingers
en bottel dit in jou oë,
dan sê jy vir my dat jy water is;
maar hoewel ek lief vir wyn is,
het ek water nodig om te leef.
Rooi soos Cabernet
bloei die wonde wat jy
in my hart
genadeloos met jou ystervingers
gegrou het.
Kom lê by my:
jou oë blou van die dou
en jou lyf vol van die son.
Hou my teen jou
sodat ek jou hart voel klop
teen die lentebloeisels
wat geil groei uit my hart.
Jou liggaam is ‘n vlakte
waarop ek duine skilder…
my hande hardloop speels
oor die blond van jou borskas,
en soek die dale van jou naeltjie
om rakelings te spring
na die spiere
wat styf span in jou arms.
Posts
All Comments
